चौथो वर्षको छात्रवृत्ति प्रदान

मोरङका ३३ जना बालिकालाई चौथो वर्षको छात्रवृत्ति प्रदान 

‘छोरी पढाऔ: गरिमा बढाऔँ’ भन्ने आह्वानसहित मानव अधिकार तथा शान्ति समाजले प्रारम्भ गरेको पाँच वर्षे बालिका छात्रवृत्ति अभियान अन्तगर्त ३३ जना विपन्न दलित समुदायका बालिकालाई चौथो वर्षको छात्रवृत्ति प्रदान गरिएको छ । मोरङ जिल्लाको थलाहामा २०८१ चैत्र २९  गते आयोजित कार्यक्रममा कटहरी गाँउपालिका, थलाहास्थित श्री जनता मा.वि का २६ जना र धनपालथान गाउँपालिका दादर वैरियाको सरस्वती मा.वि.का सात जना गरि कक्षा ८ मा अध्ययनरत ३३ जना बालिकालाई वर्ष २०८१ को चौथो वर्षको छात्रवृत्ति रकम प्रत्येकलाई रु. १२ हजार प्रदान गरिएको हो ।

शान्ति समाज मोरङ शाखाका सभापति प्रा.डा जीवन ढकालको सभापतित्वमा सम्पन्न कार्यक्रममा शान्ति समाजका सभापति रेनुका पौडेल, महासचिव प्रकाश शाही, जनता मा.वि.थलाहाका सञ्चालक समिति अध्यक्ष मोहनलाल विश्वास, विद्यालयका प्रधानाध्यापक सुनिल राई, वडा अध्यक्ष मनोजकुमार माझी, छात्रवृत्ति प्राप्त गर्ने बालिका आशिकाकुमारी सरदार लगायत वक्ताहरुले शान्ति समाजद्वारा सञ्चालित बालिका छात्रवृत्ति अभियानबारे प्रकाश पार्नुभएको थियो भने स्वागत शान्ति समाज मोरङ शाखाका पूर्व सभापति भेषराज पोखरेलले गर्नुभएको थियो । कार्यक्रममा शान्ति समाजका वरिष्ठ उपसभापति राजेन्द्र पौडेल, उपसभापति लक्ष्मीनारायण मिश्र, कोशी प्रदेश सचिव सन्तोष रौनियार, केन्द्रीय सदस्यहरु नम्रता खरेल र शम्भु राउत तथा छात्रवृत्ति पाउने विद्यार्थीका अभिभावकहरुको सहभागिता थियो । 

२०७८ सालबाट प्रारम्भ भएको पाँच वर्षसम्म प्रदान गरिने यो छात्रवृत्ति अभियानका लागि शान्ति समाजका सदस्य तथा शुभचिन्तकहरु शैशव खनाल र आर्या पाण्डेका अभिभावकहरुले चार जना, रामप्रसाद जोशीले दुई जना, अपूर्वा शर्माले दुई जना र उर्मिला पराजुलीले दुई जनालाई सहयोग प्रदान गर्नु भएको छ । यसैगरी अधिकारकर्मीहरु रामकृष्ण बराल, होमकान्त चौलागाई, उत्तम पुडासैनी, गोविन्द खनाल, कृष्णबहादुर रावल, किरण ढकाल, डिकप्रसाद घिमिरे, विकास थापा, नम्रता खरेल, सुदीप रिजाल, भेषराज पोखरेल, डिल्लीबहादुर कार्की, कोमलप्रसाद शर्मा, यमुना कँडेल, रामबाबु दाहाल, लोचन रिजाल, राजेन्द्र खनाल, भैरव रिजाल, अच्युत बराल, मीना चौलागाई, राधिका खनाल र लक्ष्मी बरालले चौथो वर्षको यो छात्रवृत्ति अभियानका लागि सहयोग गर्नुभएको हो ।