राष्ट्रपतिलाई शान्ति समाजको ध्यानाकर्षणः चुरे दोहनका कारण मरुभूमिकरणको खतरा

प्रेस विज्ञप्ति

राष्ट्रपतिलाई शान्ति समाजको ध्यानाकर्षणः चुरे दोहनका कारण मरुभूमिकरणको खतरा

 मानव अधिकार तथा शान्ति समाजको प्रतिनिधिमण्डलले सम्माननीय राष्ट्रपति रामचन्द्र पौडेललाई भेटी जलवायु परिवर्तन र विश्वव्यापी उष्णताबाट परेको प्रभाव र हिमालय÷चुरे संरक्षणबारे ध्यानाकर्षण गराएको छ । 

२०८१ असार १४ गते राष्ट्रपति कार्यालयमा भएको भेटमा शान्ति समाजले सञ्चालन गरिरहेको जगतमुखी अभियानबारे अवगत गराउँदै ९ बुँदे ध्यानाकर्षण गराइएको थियो । चाल्नी जस्तो भएर चुरेले तराईलाई संरक्षण गरिरहेकोमा चुरेको अत्याधिक दोहन र वन विनासका कारण तराईको उर्वराशक्ति ह्रास हुनुका साथै मरुभूमिकरणको खतरा बढेकोतर्फ चिन्ता व्यक्त गर्दै चुरे संरक्षण प्राथमिकता हुनुपर्नेमा शान्ति समाजले जोड दिएको छ । यसैगरी नेपालको संविधानको प्रस्तावनामा नै जीवनचक्र परिस्थिति सन्तुलन (इकोलोजिकल ब्यालेन्स) लाई सम्बोधन गर्न र सोही अनुरुप संयन्त्र निर्माण÷परिमार्जन गर्नु पर्ने शान्ति समाजले स्मरण गराएको छ । 

प्रतिनिधिमण्डलमा समाजका सभापति रामकृष्ण बराल, पूर्व सभापतिहरु होमकान्त चौलागाई र डा. गंगाधर अधिकारी, संस्थापक सदस्य कृष्ण कँडेल, महासचिव रेनुका पौडेल,  कोषाध्यक्ष किरण ढकाल, सचिवद्वय रामप्रसाद जोशी र चन्द्रमणी बञ्जारा, केन्द्रीय सदस्यहरु नम्रता खरेल र दिवाकर पुडासैनी र आजीवन सदस्य जयराम पुडासैनी संलग्न हुनुहुन्थ्यो । 

समाजका तर्फबाट

सरिता पौडेल

उपनिर्देशक, मानव अधिकार तथा शान्ति समाज 

१४ असार २०८१